एमबिबिएस अध्ययनको लागि पूर्णछात्रवृत्ति पाउन सफल विद्यार्थी शर्मा सम्मानित
सुवास आचार्य
बागलुङ, २५ चैत्र
चिकित्सा शिक्षा आयोगले लिएको परीक्षामा एमबिबिएस अध्ययनको लागि पूर्ण छात्रवृत्ति पाउन सफल बागलुङका विनायक शर्मालाई सम्मान गरिएको छ । विघामन्दिर माध्यमिक विघालय कक्षा ११ र १२ मा विज्ञान विषय लिएर पढेका शर्मालाई विद्यालयले शुक्रबार एक कार्यक्रम गरी सम्मान गरेको हो ।
सामुदायिक विद्यालयमा पढेर एमबीबीएस अध्ययनको लागि पूर्णछात्रवृत्ति पाउने शर्मा साविक धौलागिरि क्षेत्रबाट पहिलो भएको विद्यालयले प्रधानाध्यापक शान्तामणि ढकालले जानकारी दिए । शर्मालाई नगद २५ हजारसहित दोसल्ला र प्रमाण पत्रले सम्मान गरिएको थियो । सम्मान कार्यक्रममा बोल्दै शिक्षा विकास तथा समन्वय इकाई बागलुङका प्रमुख कुश्मराज उपाध्यायले सबै विद्यार्थीहरुलाई कसरी उत्कृष्ट र सफल बनाउने भन्ने बारेमा सबैले सोच्नुपर्ने बताउनु भयो ।
उपाध्यायले शिक्षाको गुणस्तर वृद्धि र सिकाइ उपलब्धी बढाउनको लागि शिक्षकको भूमिका महत्वपूर्ण हुने भन्दै शिक्षा सुधारका लागि विभिन्न सरोकारवाला निकायहरुले एक अर्कालाई दोष दिनुभन्दा जिम्मेवार भएर आफै सुधारका लागि लाग्न सुझाव दिनु भयो ।
कार्यक्रममा बागलुङ नगरपालिका वडा नम्वर ३ का वडा अध्यक्ष लक्ष्मी बाँस्कोटा,विद्यालय व्यवस्थापन समितिका सदस्य मुकेशचन्द्र राजभण्डारीले शर्माको सफलताले सामुदायिक विद्यालयप्रतिको धारणामा सकारात्मक परिवर्तन गराउन सहयोग पुग्ने बताए । सम्मान कार्यक्रममा बोल्दै विद्यार्थी विनायक शर्माले राम्रो अंक लिएर पास गर्ने सोँचले धेरै मेहेनत गरेकोले आफू सफल भएको भन्दै छात्रवृत्ति पाउँदा थप मेहेनत गर्ने ऊर्जा मिलेको बताए ।
विद्यार्थीको भविष्य असल शिक्षकको हातमा भएकोले सृजनशिल मेहनती शिक्षक र अनुशासित विद्यार्थी भयो भने शैक्षिक नतिजा उत्साहपूर्ण आउने विद्यामन्दिर माध्यमिक विद्यालयका व्यवस्थापन समितिका अध्यक्ष बाबुलाल शाक्यले बताए ।
विज्ञान संकायका शिक्षकहरुलाई धन्यवाद दिदै, विनायक शर्मा जस्ता मेधावी विद्यार्थी उत्पादन गर्न सबैले कोशिस गरे परिणाम ल्याउन सकिने अध्यक्ष शाक्यले भने ।विनायक शर्मा अध्ययनशिल र मेहनती विद्यार्थी भएकोले उनले पूर्णछात्रवृत्ति पाएर विद्यालयको नाम राखेको प्रधानाध्यपक शान्तामणि ढकालले बताए । उनले आफना सहपाठिहरुलाई पनि पढाएको देख्दा आफू साह्रै खुशी भएको विद्यामन्दिर माध्यमिक विद्यालयका प्रधानाध्यक शान्तामणि ढकालले बताए ।
मेरो सफलताको लागि परिवार,विद्यालय र शिक्षकको महत्वपूर्ण योगदान भएको शर्माले भने । सोही अवसरमा विद्यालयको भौतिक र शैक्षिक विकासमा विशेष योगदान पु¥याउने विद्यालय व्यवस्थापन समितिका पूर्वअध्यक्ष तथा भवन निर्माण समितिका पूर्वअध्यक्ष लालचन्द्र राजभण्डारी,विद्यालय व्यवस्थापन समितिका निर्वतमान अध्यक्ष तथा भवन निर्माण समितिका पूर्वउपाध्यक्ष सुभासचन्द्र राजभण्डारी,समाजसेवी देव बहादुर श्रेष्ठ र विद्यालय व्यवस्थापन समितिका पूर्वसदस्य जशोदा शर्मा र सम्मानित विद्यार्थीका वुवा रवि शर्मालाई सम्मान गरिएको थियो ।
कार्यक्रम विद्यामन्दिर माध्यमिक विद्यालय व्यवस्थापन समितिका अध्यक्ष बाबुलाल शाक्यको अध्यक्षता, विद्यालयका प्रधानाध्यापक शान्तमणि ढकालको स्वागत र शिक्षक कुलराज शर्माको संचालनमा सम्पन्न भएको थियो ।
